OP#6: "Pa, Hindi Mo Na Ba Talaga Naaalala?"

Isinulat ni Karinna Abueg

Tatay, Itay, Ama, Daddy, Papa

O kung ano mang tawag pa

Pa, hindi mo na ba naaalala?

Noong ako'y bata pa?

Sa bisig mo ako'y iyong karga-karga

Ni minsan hindi tayo nawalay sa isa't isa

Sa mga yakap mo ako'y kuntento na

Noong mga panahong iyon, wala na akong mahihiling pa

Pa, naaalala mo pa ba?

Noong ako'y bata pa

Bago matulog, lagi mo akong kinukwentuhan na

May kasamang kiliti at aksyon pa

Pa, naaalala mo pa ba?

Noong ako'y bata pa

Sabi mo sakin ay wag akong dudumi sa aking salawal

Ngunit ginawa ko pa rin dahil iyong pinagbawal

Pa, naaalala mo pa ba?

Noong ako'y bata pa

Ika'y nagagalit sa tuwing may nagpapaiyak sakin

Pero pa, anong nangyari?

Nang dahil sa masamang bisyo

Tila ba ang pagiging ama ay nakalimutan mo

Sarili mong pamilya tinalikuran mo

Sarili mong pamilya sinira mo

Nang dahil sa masamang bisyo

Hindi mo alam na isa ako sa mga sobrang apektado

Apektado ako dahil na rin sa kagagawan mo

Apektado ako dahil ikaw ang papa ko, pero hindi ko na masambit iyon sa bibig ko

Pa, hindi mo na ba naaalala?

Ikaw ang dating dahilan ng aking pagngiti

Pero ngayon, ikaw na ang dahilan ng aking pighati

Pa, hindi mo na ba naaalala?

Sa bawat mga pag ngiti ko noon, ikaw ang dahilan

Ngunit sa bawat mga pighati ko ngayon, ikaw na ang dahilan

Pa, hindi mo na ba talaga naaalala?

Mga alaala natin noon, mananatili na lamang bang alaala?